لازم يكون عندنا أمل

انا درست ادارة اعمال .. واخدت دبلوم فى إدارة الاعمال من الجامعة الأمريكية .
وكنت بحب اشتغل من وانا فى الجامعة ..وكان بابا دايما معترض على ده ..بس انا كنت بستسخف اوى انى اقف قدام بابا واقوله هات مصروف .. مع انه بصراحه عمره ما بخل عليا وطول عمره كان بيدينى ببذخ .. ربنا يشفيه يارب . 
اشتغلت بعد ما تخرجت سكرتيره تنفيذيه واشتغلت مدرسة لغة إنجليزية ولكنني عمري مالقيت نفسى فى الشغل ده .. وده لانى ماكونتش عاوز ادرس ادارة اعمال أساسا ..بس الله يسامحه التنسيق بقى فرقت معايا 1 %علشان ادخل فنون جميله
وبعد كام سنه قررت اعمل اللي بحبه وهو الرسم 
وابتديت بالرسم على الطرح والمفارش .. وكانت بتعجب الناس واشتغلت فيها فتره .. وطبعا ربنا يخليلنا الصين وطرح الصين اللى وقفت حالنا وخربت بيوتنا وكانت طرحة الصين بتتباع ارخص من تمن القماش الخام اللى كنت بجيبه ..
المهم بعد مالحال وقف قولت ابدا .. انا مش حستسلم .. انا حعمل الملابس اللى نفسى فيها ..بالطريقة اللي نفسى فيها ومع طرحتها . وجبت عمال .. وطبعا خدنا وقت كبير على ما لناس عرفتنا .. وبعد صبر وتجارب وحاجات تبوظ وحاجات تفرقع وتنجح بقى لينا اسمنا ..واتعرفنا فى الهرم كله .. وابتديت اظهر فى الميديا والناس تعرفنى اكتر واكتر .. وقررت اعمل شو روم للناس واقابلهم واشوف طلباتهم بنفسي .. وفعلا اخدنا مكان احسن واوسع وظبطنا الدنيا بعد صبر سنين وتنقل من شقه لشقه ومضايقاه من البشرية وده طبعا لانى بنت لوحدي .. المهم مفاتش سنه على المكان الجديد اللى كنت فرحانه بيه ..وحصل ان العمارة انفجرت بقنبلة على ايد إرهابي حقير .. وراح الاتيليه اللي كنت بحلم بيه ومالحقتش افرح بيه .. لكن واقسم بالله كنت راضيه جدا ورجعت من الحادث صليت ركعتين شكر لله انه نجانى من موت محقق وعمى أصابني من الخضة والصدمة وبرضوخ شفانى منه ... ورجعت أحاول الملم نفسى واللي باقي من الاتيليه .. واخدت مكان صغير علشان احط فيه حاجتى والاشلاء اللى بقيت من الانفجار .. وكنت كل  ما  احس انى مخنوقة وعاوزة اعيط ..اشتغل .. واحط كل زعلى وحزنى فى القطعة اللي انا مسكاها .
وكنت طول الوقت بقول لنفسى " اوعى يارانيا تعملي شغل وحش والناس تقول الحادثه اثرت على مستواك .. اوعى الانفجار يهزك ويأثر على شغلك ونجاحك اللى بنيتيه من سنين ..اوعي تضيعي تعب 16 سنه "... 
وفعلا عملت الكولكشن الأخير ... والحمد لله الحمد لله .لاقى صدى جامد اوى .ومازال مكسر الدنيا الحمد لله.. انا ماكنتش متخيله انه حينجح كده .. فعلا ان مع العسر يسر ... وادينا اهو رجعنا لارض الملعب .. وان شاء الله كله يتعوض .. وكله يبقى احسن من الأول طول ما فينا نفس .. لازم يكون عندنا امل.