رفضت الفنانة يسرا الارتباط الشائع بين التقدم في العمر وبين غياب الشغف بمتع الحياة، مؤكدة أنها تحترم عمرها ولكنها بنفس الوقت تعشق الغناء والرقص، وتريد الاستمتاع بكل لحظة في عمرها، كما كشفت لأول مرة عن تعرضها للإجهاض مرتين في زيجتها الأولى، وقالت إنها لا تشعر الآن بالندم لعدم تحقيق حلم الأمومة.

أشارت يسرا خلال حلولها ضيفة ببرنامج «كلام نواعم»، المذاع عبر قناة mbc1، إلى انها لا تعترف بجملة «أنا كبرت في السن»، وأنها تعتبر أن السن مجرد رقم فقط، وقالت: بحترم السن اللى أنا وصلتله، هيقولولي مثلا انتى بترقصى وبتغنى في كل مكان مرة واحدة كده، أه طبعا بعمل كده أنا بنى أدمة بحب انبسط، وأعيش واحب الناس اللى معايا تبقى مبسوطة مينفعش ابقى قاعدة متكبره والعمر مجرد رقم.

وحول حصاد العام 2022، قالت يسرا: أجمل حاجه حصلتلى خلال عام 2022، هي نجاح مسلسل أحلام سعيدة، وأسوأ حاجة حصلتلى في هذا العام هو فقدان الفنان هشام سليم، كما تحدثت أيضا لو كان لديها القدرة على اعادة يوم واختياره مجددا قائلة: هختار كل يوم كنت بعيده فيه عن أمى، ترجع تانى عشان أكون معاها.

ووجهت يسرا نصيحة للسيدات قائلة: انصحك تستمتعى بحياتك وتعيش بسعادة،كونى أم وزوجة رائعة،وتألقى في عملك.

وأكدت يسرا أنها لا تشعر بالحزن لأنها لم تنجب أطفالا بل على العكس تحمد الله على ذلك، وقالت: وأنا في التلاتينات كان عندي هاجس أني لازم أبقى أم لأني معطاءة بطبعي كنت هموت وأخلف، وبعدين حصل أني فقدت طفلين في زيجتي الأولى، ولما اتجوزت خالد قولتله نخلف ملقتوش مبسوط من الموضوع دا وقال نشوف.

واضافت يسرا: قولت مش عاوز يخلف مني وسألته إن كان قلقان أني مكونش أم كويسة قالي أنتي الست الوحيدة اللي أتمنى أخلف منها لكن الزمن اللي هنخلف فيه على بال ما يكبر بعد 20 سنة هتبقى حياة مختلفة مش هيشوفوا اللي إحنا شفناه هتبقى حياتهم أسرع وسطحية وأنا مش عاوز أشوف عيالي كده، وأنا بعد فترة اقتنعت وبقول الحمد لله أني مخلفتش.

وتابعت يسرا موجهة رسالة إلى كل السيدات اللواتي حرمن من نعمة الأمومة: أوعوا تزعلوا من قدر ربنا مديهولكم قدر أنتم مش حاسين بيه، مع الوقت تخطيت الشعور وبالتجارب شفت ناس فقدوا أولادهم ومش قادرين يعيشوا وشفت ناس أولادهم عاصيين ليهم معرفش إيه ممكن كان يحصلي ممكن مكنش استحمل أن يكون عندي طفل ويموت وبالنسبة لي خالد هو حياتي وابني وجوزي ربنا عوضني وبقول للي ما خلفش ميزعلش واللي خلف يحمد ربنا.

قد يهمك أيضا

يسرا تقدم الدراما الاجتماعية الكوميدية في مسلسل "حمد الله على السلامة"

يسرا تردّ على غزل شاروخان وانتقادات السوشيال ميديا